Madde Detay

Tezkirelerde Şurûʻî mahlaslı herhangi bir şair bulunmamaktadır. Ancak Topkapı Sarayı Kütüphanesinde bulunan ve 16. yüzyılın sonlarında tertip edilen bir şiir mecmuasında (Revan 1972) “Murabba-ı Şurûʻî” başlığıyla şaire ait bir murabba kayıtlıdır. Bu murabbaın kayıtlı olduğu şiir mecmuasının tertip tarihi göz önünde bulundurulduğunda Şurûʻî’nin de 16. yüzyıl şairlerinden olduğu kabul edilebilir.

Mecmûa-i Eşâr. Topkapı Sarayı Kütüphanesi “Revan 1972”. vr. 83a.

Murabbaʻ

I

Ben cefâkeş ʻâşıkuñ kaddini kılduñ sen kemân

Tabl-ı sînem karşu virdüm tîrüñe kılduñ nişân

Sûz-ı âhumdan cihânı dil-berâ dutdı duhân

Ben Muhammed çâkeriyem ol durur şâh-ı cihân

II

Bunca yıldur geşt iderdüm ʻâlem içre serserî

ʻIşk derdinden efendi nice oldum Hayderî

Bî-nevâ-yı rind-i ʻışkam ben görelden çün seni

Ben Muhammed çâkeriyem ol durur şâh-ı cihân

III

ʻÂşık-ı dîdârıyam devr ideliden ben hemîn

Eylerem gül-ruhları karşusına zâr [u] enîn

Fehm idemez baksa biñ yıl sırr-ı laʻlüñ hod-bîn

Ben Muhammed çâkeriyem ol durur şâh-ı cihân

IV

ʻÂşıkam rûyında yir yir dil-rübânuñ hâline

Hîç terahhum eylemez üftâdesinüñ hâline

Devr-i hüsnüñde anuñ girdüm melâmet şâline

Ben Muhammed çâkeriyem ol durur şâh-ı cihân

V

Hak Teʻâlâ kim aña virmiş dürür şemʻ-i cemâl

Hüsni ayına anuñ çün virmesün Tañrı zevâl

Öykünemez leblerüñe sen şehüñ âb-ı zülâl

Ben Muhammed çâkerîyem ol-durur şâh-ı cihân

VI

Bu dil-i dîvâneyi bir lahzada şeydâ ider

Gâret itdi göñlümi ol pür-cefâ yagmâ ider

ʻÂkıbet abdâl idüp ben ʻâşıkı rüsvâ ider

Ben Muhammed çâkeriyem ol durur şâh-ı cihân

VII

Gel vefâ eyle Şurûʻîye şehâ geh geh cefâ

Bu durur sizden recâsı ey Muhammed Mustafâ

Okuyasız dâ’imâ rûh-ı şerîfine duʻâ

Ben Muhammed çâkeriyem ol durur şâh-ı cihân

(Mecmûa-i Eşâr. Topkapı Sarayı Kütüphanesi “Revan 1972”. vr. 83a.)