Madde Detay

Latîfî’ye göre Mudurnu’da (Canım 2000: 286) diğer kaynaklara göre İstanbul’da doğdu. Asıl adı bilinmeyen şairin mahlası Zârî’dir. Terzilik yaparak geçimini sağladı. Mesleğine nispetle Sûzenî veya Zârî-i Sûzenî adıyla tanındı. Vefat tarihi Hasan Çelebi’de 960/1553 (Sungurhan Eyduran 2009: 354) , Âşık Çelebi’de ise 970/1663 (Kılıç 2010:577) olarak verilmiştir. Şiirlerindeki ince hayaller dönem şairleri tarafından beğenilirdi.

Gazel
Künc-i mey-hâne cây-ı eglence
Kayd-ı dünyâ dilâ bir işkence

Pehlevândur eline sâgar alan
Şîr-i ner bebr ile tutışur nice

Bir güzel vaslına irişmekdür
Karı dünyâda ugramak gence

Eblehâne degül mi fikr-i tâvil
Ömr kûteh bu rûz şeş-pençe

Ne kadar gussa çekse bu Zârî
Bir iki câm ile olur şence
*
Gazel
Çün hakîkat rûyına ey dil mecâzî perdedür
İsti‘ârât u kinâyâtı ko gel ol perdedür

Eyleme zâhid tereddüd düş ayagına müdâm
Himmeti pîr-i mugânun da‘imâ her ferdedür

Gözleme evc-i semâyı hâk-i râh ol ey gönül
Çün bilürsin kimse basmaz ol yüzi kim yerdedür

Halk-ı âlem mûmdur kapusına kul olmaga
Var ise mühr-i Süleymân ol perî-peykerdedür

Gelmez uyhu gözlerüme Zâriyâ şeb-tâ-seher
Tâ ki gönlüm ol saçı leylî yüzi enverdedür
*
Gazel
Mey kim mükeyyifât-ı cihân serveri durur
Her câmına hezâr zer ayak deri durur

Sûretde gerçi duhter-i nâzük durur velî
Ma‘nîde gussa pîrezeninün eri durur

Sûfî mey içmezem diyü halka riyâ satar
Pîr-i mugânı gör ki riyâda berî durur

Mey hıdmetinden olmasa hâlî aceb degül
Zârî emîr-i meygedenün çâkeri durur
*
Göz karasın eşk ile yuyayın agarınca
Tâ kim nazarı pâk ola dîdâra varınca

Kirpiklerünün cânuma geçdüklerin ey dôst
Bir bir diyeyin igneden iplige varınca
*
Gördükde hat-ı la‘lini cân itdi şehâdet
Yüz sürdügine mihr-i Süleymân’a karınca

Dök şeb-nem-i eşkün gözüm ol kâküli sünbül
Nergislerini hâb-ı seherden uyarınca

Yâriyle görenler diyeler Zârîyi bir gün
Böyle onarur kişiyi Allâh onarınca

(Kılıç, Filiz (hzl.) (2010). Ȃşık Çelebi, Meşâ’irü’ş-Şu’arâ. C. 1. İstanbul: İstanbul Araştırmaları Enstitüsü Yay. 577-579.)