Madde Detay

Tezkirelerde Beytî mahlaslı herhangi bir şaire rastlanmamaktadır. Ancak Topkapı Sarayı Kütüphanesinde bulunan ve 16. yüzyılın sonlarında tertip edilen ve hemen hemen hepsi bu yüzyılda yetişmiş şairlerin manzumelerinden müteşekkil olan bir şiir mecmuasında (Revan 1972) “Müseddes-i Beytî” başlığıyla şaire ait bir müseddes kayıtlıdır. Bu müseddesin kayıtlı olduğu şiir mecmuasının tertip edildiği dönemden hareketle Beytî’nin de 16. yüzyıl şairlerinden olduğunu kabul etmek mümkündür.

Mecmûa-i Eşâr. Topkapı Sarayı Kütüphanesi “Revan 1972”. vr. 94a.

Müseddes

I

Muktezâ-yı dehri izʻân eyleyenler zümresi

Her biri bir âsitânı tutdı oldı bendesi

Devlet ü ikbâl ü câha bulmaga dest-resi

Yüz sürüp bir dergehe oldı anuñ efgendesi

Herkesi bir kimsene idindi ʻâlemde kesi

Kimsenem yokdur benüm hey kimsesizler kimsesi

II

Düşdi herkes bir kapuya olmag içün ber-murâd

Eyleyüp bir âsitâna her birisi istinâd

İşigüñde nice mahzûn derd-mendler oldı şâd

Çâre-sâz olsañ ʻaceb mi kılsañ ola bize dâd

Herkesi bir kimsene idindi ʻâlemde kesi

Kimsenem yokdur benüm hey kimsesizler kimsesi

III

Bî-derem virmez dirîgâ öpmege cânân elin

Kesr-i ashâb-ı safâda sâkî-i devrân elin

Kimi paşa dâmenin tutdı kimi sultân elin

Lutf idüp ol destgîrüm sun meded dermân elin

Herkesi bir kimsene idindi ʻâlemde kesi

Kimsenem yokdur benüm hey kimsesizler kimsesi

IV

Bir harâb-âbâd idi maʻmûr idüp kılduñ binâ

Şöyle bir hayr işledüñ kim yok durur hem-tâ aña

Câmiʻ-i nevle Gedûsı eyledüñ çün kim ihyâ

Kaʻbeyi yapmak dilerseñ hâtırum yap serverâ

Herkesi bir kimsene idindi ʻâlemde kesi

Kimsenem yokdur benüm hey kimsesizler kimsesi

V

Beytî-i bî-çâre gelmişdür kapuñdan kılma red

Muʻteber olmak gerek yanuñda erbâb-ı hıred

Nîce bî-kes âsitânuñ taşını kıldı sened

İşigüñ dârü’ş-şifâsından olur baña meded

Herkesi bir kimsene idindi ʻâlemde kesi

Kimsenem yokdur benüm hey kimsesizler kimsesi

(Mecmûa-i Eşâr. Topkapı Sarayı Kütüphanesi “Revan 1972”. vr. 94a.)