Madde Detay

II. Mahmûd dönemi (1808-1839) şairlerindendir. Musâhib-zâde sanıyla tanındı. Enderun'da yetişti. Vefat tarihi bilinmemektedir.

Şiirine örnek Tayyâr-zâde Atâ Târîhi'ndedir.

Arslan, Mehmet (hzl.) (2010). Tayyârzâde Atâ - Osmanlı Saray Tarihi - Enderûn Tarihi. C. IV. İstanbul: Kitabevi Yay.

Şarkı

Nev-bahâr irdi yine kesb‑i mesâr eyyâmıdır

Zevk idüp gel gül açıl ey gül-izâr eyyâmıdır

Bülbül-i şeydâlara feryâd u zâr eyyâmıdır

Azm-i gülşen eyle cânânım bahâr eyyâmıdır

Gonca reng alsun görüp ruhsâr-ı âlinden senin

Nükhet alsun sünbül ü ful zülf ü hâlinden senin

İbret alsun serv kadd-i i'tidâlinden senin

Azm-i gülşen eyle cânânım bahâr eyyâmıdır

Serv-i nâzım eyle bâgı sû-be-sû geşt ü güzâr

Girye-i çeşmim gibi çaglar hemîşe cûy-bâr

Hâl‑i âşıkdır dem-â-dem âh u zâr eyler hezâr

Azm-i gülşen eyle cânânım bahâr eyyâmıdır

Sahn-ı sînem cilve-gâh olsun sana eyle hırâm

Lutf idüp kıl Edhem-i şeydâyı mesrûr u be-kâm

Hâsılı bezm-i çemende olsun icrâ-yı merâm

Azm-i gülşen eyle cânânım bahâr eyyâmıdır

(Arslan, Mehmet (hzl.) (2010). Tayyârzâde Atâ - Osmanlı Saray Tarihi - Enderûn Tarihi. C. IV. İstanbul: Kitabevi Yay. 561.)