Madde Detay

Biyografik kaynaklarda Nushî mahlaslı bir şaire rastlanmamaktadır. Ancak Hekimoğlu Ali Paşa’nın 1155/1742 yılında ikinci defa sadrazam olması üzerine çeşitli şairlerce tanzim edilen manzumelerin derlendiği Mecmûa-i Tevârîh’te, Nushî’ye ait de bir tarih kıtʻası kayıtlıdır. Bu manzumenin Hekimoğlu Ali Paşa’nın sadaretine tarih düşürülmek amacıyla kaleme alınmış olması, şairin 18. yüzyılın ortalarında hayatta olduğunu göstermektedir.

Mecmûa-i Tevârîh. Süleymaniye Kütüphanesi “Esad Efendi 3388”. vr. 24a.

Târîh-i Nushî Efendi

Bi-hamdi’llâh kerem bâbın güşâde eyledi Mevlâ

Serîr-i sadrı teşrîf itdi bir zât-ı kerem-fermâ

Getürdi kutb-ı eflâk-i ʻatâyı merkez-i mihre

Felek vefk-i murâd üzre bugün devr eyledi hakkâ

Zihî düstûr-ı aʻzamdur ki kutb-ı dîn ü devletdür

Vücûd-ı maʻdelet-âsârı mülk ü saltanat-pîrâ

Hayât-ı cism-i ʻâlemdür vücûd-ı pür-kerâmâtı

Hüveydâ zât-ı pâkinde dem-i ʻÎsî yed-i beyzâ

Ne emre mühr-i tedbîri iderse zerre-perverlik

Gelür burc-ı niʻâma devr ider şems-i münîr-âsâ

ʻAceb mecmûʻa-i sırr-ı Hudâdur levha-i fikri

Nüvişte kilk-i kudretle rumûz-ı ʻalleme’l-esmâ

Saf-ı rezm-i şecâʻatde kemîne bendesi Rüstem

Fezâ-yı haşmetinde bir gedâ-yı kemterin Dârâ

Zemîne sâye-güster devha-i lutf-ı berûmendi

Resîde şâh-ı ihsânı felekde tâ ser-i cevzâ

Keşîde-hân-ı eltâfı heme âfâka ser-tâ-ser

Güşâde hân-ı inʻâmı kamu etrâfa ser-tâ-pâ

Göreydi Bermekî Hâtem sehâ-yı tabʻ-ı pür-cûdın

Kerem lafʻın tezekkürde iderdi şerm ü istihyâ

Murâdım bir iki beyt ile ʻarz-ı bendegî yohsa

Beyân-ı vasfına kâdir degül dünyâ vü mâ-fîhâ

Bahâr-ı gülşen-i ʻömri tarâvetle ola dâyim

Nihâl-i zâtı âşûb-ı hazânı görmeye aslâ

Cihân turdukça tursun sadr-ı vâlâ-yı sadâretde

Esâs-ı kasr-ı devletdür vücûd-ı eşrefi zîrâ

İkinci defʻada teşrîf idince sadr-ı aʻlâya

Suhan-dân-ı zamâne oldılar târîhine gûyâ

Temennâ-yı bekâsıyla didi Nushî de bir târîh

Makâm-ı sadr-ı aʻlâda ola bâkî ʻAlî Pâşâ

(Mecmûa-i Tevârîh. Süleymaniye Kütüphanesi “Esad Efendi 3388”, vr. 24a.)